സൈബർ സഞ്ചാര വീഥികൾ ഇന്ത്യൻ മഹാസമുദ്രത്തെക്കാളും വിശാലമാണെന്ന് ആരോ പറഞ്ഞത് ഓർമ്മവരുന്നു. ജീവിതത്തിൽ ഒരു സോഷ്യൽ-ഇതര നെറ്റ്‌വർക്കുകളിൽ മെമ്പർഷിപ്പ് എടുക്കാത്ത എന്നെ സംബന്ധിച്ചിടത്തോളം ഇതുവരെ അതിനു പ്രസക്തിയില്ലായിരുന്നു. മുഖപുസ്തകത്തിൽ അംഗത്വമെടുക്കാത്ത സൈബർ സഞ്ചാരി ഞാൻ മാത്രമായിരിക്കും!
നിമിഷ മരണം സംഭവിക്കുന്ന മുഖപുസ്തകത്തേക്കാളും മികച്ചത് ബ്ലോഗു രംഗം തന്നെയെന്ന തോന്നലിൽ ബ്ലോഗുകൾ സ്ഥിരമായി വായിക്കാൻ തുടങ്ങിയിട്ട് നാലു വർഷങ്ങൾ കഴിഞ്ഞിരിക്കുന്നു. ഇടക്കിടക്കു നടക്കുന്ന തെറിവിളികളും തല്ലും അനാവശ്യ വിവാദങ്ങളും ഒഴിവാക്കിയാൽ ഏറ്റവും നല്ല വായന നടക്കുന്നതിനു മലയാളബ്ലോഗുകൾ ഉപകാരം തന്നെയാണ്.
ബ്ലോഗുവായനയും എഴുത്തും മറികടന്ന് ഫേസ്‌ബുക്കിലെ നിമിഷ മരണങ്ങളിലേക്ക് മലയാള ബ്ലോഗർമാർ അകന്നു പോകുന്നത് നിത്യകാഴ്ചകളായപ്പോൾ സഹതാപമാണു തോന്നിയത്. സൈബർലോകത്തെ ഒരുമകളുടെ കഥകൾ തൊടുപുഴ മുതൽ ഇപ്പോൽ തുഞ്ചൻ പറമ്പുവരെ എത്തി നിൽക്കുമ്പോൾ ബ്ലോഗെഴുത്തും വയനയും മലയാളത്തിൽ അസ്തമിച്ചു എന്നു കരുതാൻ വയ്യ.
പതിവായി ബ്ലോഗെഴുതുന്ന പലരും മറ്റുള്ള ബ്ലോഗുകളിൽ അഭിപ്രായമെഴുതുന്നില്ല എന്നതാണു വായനയിൽ എനിക്കു ദൃശ്യമായത്. അതുകൊണ്ടുതന്നെ അവരുടെ ബ്ലോഗുകളിലും അഭിപ്രായങ്ങൾ കുറവാണ്. എഴുതുന്നവർ മറ്റുള്ളവരുടെ ബ്ലോഗുകളും പരമാവധി വായിക്കണമെന്നും അഭിപ്രയങ്ങൾ രേഖപ്പെടുത്തണമെന്നുമാണ് എനിക്കു പറയനുള്ളത്. ദീർഘകാലം നിങ്ങളുടെയൊക്കെ ബ്ലോഗുകൾ വായിച്ച ഞാൻ അനോണിയായെങ്കിലും പരമാവധി അഭിപ്രായം എഴുതാൻ ശ്രദ്ധിച്ചിട്ടുണ്ട്.
പോസ്റ്റുകൾ എഴുതാനുള്ള ത്രാണിയില്ലെങ്കിലും ബൂലോകത്തേക്ക് ഞാനും ചുവടു വെച്ചുപോകുകയാണ്. നിങ്ങളുടെ ഏവരുടേയും അഭിപ്രായങ്ങളും നിർദ്ദേശങ്ങളുമായിരിക്കും എനിക്കു പ്രചോദനവും വഴികാട്ടിയും... ഇനി സനോണിയായി നിങ്ങളോടൊപ്പം ഉണ്ടാവാൻ പരമാവധി ശ്രമിക്കാം....
സ്നേഹപൂർവ്വം,
റീമ നമ്പീശൻ
